Kryesia e PS zyrtarizoi edhe pesë kandidatët e tjerë për zgjedhjet e pjesshme të 9 nëntorit.
Krahas Ogerta Manastirliut që garon për Tiranën që u vendos në asamblenë e 11- shtatorit, këtë të martë, mazhoranca surprizoi me emrin e deputetes së Vlorës, Brunilda Mersini. Asaj do t’i duhet të lirojë mandatin e saj për t’i hyrë garës për lokalet.
Gramoz Sako, ish-kryetari i Gardës së Republikës, do të udhëheqë garën për Tepelenën. Ai u dorëhoq në shkurt 2024 nga pozicioni i mëparshëm.
Në Mat, PS do të kandidojë me financierin Altin Bojni. Në Berat do të jetë Ervin Ceca, aktualisht kryetari i komanduar i kësaj bashkie detyrë të cilën e ka marrë më 13 mars pas dorëheqjes së Ervin Demos që u bë deputet.
Ndërsa në Cërrik kandidati i PS do të jetë Florenc Doka, i cili është kryetar i komanduar që prej emërimit të Andi Sallës si ministër në kabinetin e ri qeveritar.
Mbledhja e Kryesisë së PS, që nisi në orën 18:00, zgjati vetëm 20 minuta dhe përcaktoi kandidatët që do të garojnë për gjashtë bashkitë e vendit.
