Përfaqësuesi i Lëvizjes Vetëvendosje në Tiranë, Elvis Hoxha mendon se LVV në Kosovë do të fitojë gjysmën e Parlamentit në zgjedhjet e 14 shkurtit. Ai komentoi për edicionin qendror të lajmeve në “Vizion Plus” edhe vendimin e Gjykatës Supreme për të lënë jashtë gare Albin Kurtin. Sipas Hoxhës, ky vendim tregon se gjyqësori po fut “hundët” në politikë.
“Ne kemi deklaruar që ky është referendum sepse është ndarë më dysh. Kemi një pushtet të deklasuar plotësisht, të konsideruar të vjetër, që na deklaruan faktin që Kosova mund të udhëhiqet nga një qeveri nul. Edhe pse Valdete Daka ka mashtruar publikisht duke thënë se Arifi nuk e dinte si rast, shkatërrojnë plotësisht kushtetueshmërinë e Kosovës. Kurse ai që do të fitojë 50% ose më tepër të vendeve në Parlamentin e Kosovës, pengohet. Kjo është ndërhyrje e hapur e pushtetit gjyqësor në politikë. Kjo mund të shkojë edhe më tej, nuk ka kufij. Në Shqipëri është ndryshe, populli nuk është ende lojtar. Kurse në Kosovë, zgjedhjet janë aty dhe ka pjesëmarrje masive. Ne do të shkojmë ndoshta në 1 milion votues në Kosovë. Sa më shumë e dobësojnë rendin, aq më shumë do të vijë përgjigja nga qytetarët. Vetëvendosja do të marrë gjysmën e Parlamentit”, u shpreh ai për “Vizion Plus”.
Elvis Hoxha komentoi edhe angazhimin e Lëvizjes Vetëvendosje në zgjedhjet e 25 prillit në Shqipëri. Teksa deri tani janë prezantuar kandidatët në tre qarqe, ai deklaroi se për LVV nuk është e rëndësishme mbushja e listës me emra, por që ata të jenë figura dinjitoze.
“Do ja dalim, më e rëndësishmja është pjesëmarrja me një përfaqësues të denjë. Merxhani e njeh Gjirokastrën sepse ka punuar për dhjetë vjet. Është shumë e rëndësishme t’i prezatojmë Gjirokastrës një njeri me dinjitet.Jemi ende në reflektim për pjesën tjetër, do të mendojmë shumë mirë sepe janë kandidatë të dalë nga zgjedhësit dhe nuk duam të vendosim në listë emra të pamenduar mirë. Këta janë deputetë nga zgjedhësit, nuk është se kemi ndonjë limit, kemi sistem zgjedhor jashtëzakonisht harbut ndaj mundësisë sepse partitë janë të detyruara të ndërtojnë listë të plotë. Ne nuk e kemi këtë ngut mbi veten, duam të prezantojmë njerëz me dinjitet dhe jo thjesht për të mbushur listën, kur të piqen kushtet, synojmë pushtetin”, tha Elvis Hoxha për gazetaren Pranvera Borakaj.
