Klaudio Prendi, 30 vjeç, u ekzekutua rreth orës 00:36 të 19 nëntorit, sapo doli nga një lokal në rrugën “Xhanfize Keko”, në zonën e njohur si “Xhamlliku”.
Një orë pas krimit të rëndë, policia gjeti një mjet tip “Audi A4” duke u djegur në afërsi të Liqenit të Farkës. Dyshohet se mjeti u përdor nga autorët, të cilët më pas i vunë flakën.
Ekspertët e krimeve, ditën e sotme, pas një kontrolli të dytë që kanë kryer në makinën e djegur tip “Audi A4”, kanë gjetur dhe armën e krimit një pistoletë, e cila ishte plotësisht e djegur.
Rruga që ndoqi makina e autorëve
Makina e autorëve ka qënë duke zbritur nga rruga e Freskut. Sapo i riu ka hipur në mjetin e tij, ata e kanë qëlluar disa herë dhe plumbat e kanë kapur në kokë dhe në kraharor. Fill pas kësaj autorët janë larguar drejt qendrës. Shokët e Prendit kanë dalë nga lokali dhe me makinën e viktimës janë nisur drejt spitalit te Traumës.
Makina e autorëve “Audi A4” ka qenë me targa greke të mbivendosura. Ende nuk është këqyrur numri i shasise pasi është dëmtuar nga djegia.
Agjentët e policisë kriminale po përpiqen të përftojnë te dhëna për të mësuar pronësinë e makinës, nëse rezulton apo jo e vjedhur.
Ndërkohë agjentët e policisë kriminale janë duke këqyrur edhe makinën tip “G Class” në të cilën ndodhej Prendi në momentin e vrasjes./vizionplus.tv
