Policia e Shkodrës ka finalizuar me sukses operacionin policor “Buna” nga ku tre shtetas u arrestuan dhe një tjetër u procedua penalisht.
Operacioni u zhvillua nga Forca e Posaçme “Shqiponja” në bashkëpunim me Specialisët për hetimin e Narkotikëve në DVP Shkodër dhe Patrullën e Përgjithshme të Komisariatit të Policisë Shkodër pas informacioneve të marra në rrugë operative, se disa të rinj dispononin lëndë narkotike, si dhe në banesa mund të kishin edhe armë zjarri.
Shtetasit e arrestuar janë: M. Sh., 22 vjeç; E. M., 21 vjeç, dhe E. V., 31 vjeç, të tre banues në Shkodër. Ndërsa u proçedua në gjendje të lirë shtetasi B. Q., 23 vjeç banues po në Shkodër.
Këta shtetas u arrestuan në vendin e quajtur “Ura e Vjetër” e Bunës, teksa po udhëtonin me një mjet “Volksëagen”, ndërsa gjatë kontrollit u kapën me një qese me masë kristalore të dyshuar si lëndë narkotike kokainë me dy pilula ekstazi si dhe me një sasi kanabisi. Po ashtu policia gjeti në xhepin e xhupit të njërit prej të arrestuarve dhe një peshore të vogël elektronike.
Ndërsa nga kontollet e ushtruara në banesat e shtetasve të arrestuar u gjetën dhe sekuestruan 3 armë zjarri pistoletë, një sasi fishekësh dhe një krehër si dhe një sasi tjetër lënde narkotike kanabis.
