Sot nisi për herë të parë aplikimi i testeve të shpejta në Tiranë për të dyshuarit me COVID. Specialistja e Institutit të Shëndetit Publik, Marjeta Dervishi, tha në edicionin e lajmeve në “Vizion Plus” se testimi do të ndihmojë epidemiologët e terrenit për të hetuar në kohë reale vatrat me rrezik të lartë infeksioni.
E pyetur për efektivitetin e testeve dhe si do të ndikojnë në hetimin epidemiologjik, Dervishi pohoi se: “Testimi do të ndihmojë epidemiologët e terrenit për të hetuar në kohë reale vatrat, duke patur parasysh edhe rrezikun e transmetimit në ato vatra. Janë teste diagnoze. Nuk kanë nevojë për të bërë një ritestim, pas këtij testi të shpejtë. Janë shumë efikase në punën tonë, për të rritur jo vetëm numrin e testimeve, por edhe për të na ndihmuar ne për të bërë të mundur hetimin epidemiologjik në kohë reale.”
Marjeta theksoi se avantazhi i testeve të shpejta është koha. “Për gjysmë ore ne marrim rezultatin e testit, ndryshe nga tampon që kërkon një kohë më të gjatë. Do të vijohet në dy mënyra, edhe me testet e shpejta dhe tamponin. Duke marrë një rezultat të shpejtë, do të arrijmë të bëjmë edhe hetimin epidemiologjik në kohë. Pjesë e tij do të jetë edhe izolimi, gjurmimi. Do të ndihmojë për të bërë një parandalim të transmetimit të këtij virusi.”
Më tej, Dervishi sqaroi se në Shqipëri do të vijnë sasi të tjera të testeve të shpejta që do të bëjnë të mundur hetimin epidemiologjik në kohë.
