Orinda Huta e ka provuar fustanin e nusërisë që prej vitit 2006, kur Marçela dhe Mandi, e ftuan të sfilonte në pasarelën e Geraldina Sposës. Këta të fundit, do të ishin dy personat që Orinda do t’i besonte për të përzgjedhur fustanin e ‘vërtetë’ të nusërisë. Një udhëtim në Barcelonë, do t’i vinte kapakun se cili do të ishte fustani i saj i ëndrrave. Në muajin janar, u prezantuan prurjet e reja për koleksionet e vitit 2018, përsa i përket veshjes së nusërisë. Fustanin që Orinda zgjodhi, ishte dashuri me shikim të parë, që në momentin kur ai u prezantua në pasarelat spanjolle.
“Është një fustan i qëndisur i tëri me dantellë franceze. Një dekolte shumë romantike, një siluetë fantastike ajo e Orindës, e cila evidentohej akomë e më bukur, për shkak të ngjyrës së astarit, i cili ishte një ton më i errët për t’i dhënë mundësi dantellës të lexohej më mirë mbi fustan. Një fustan i modës së lartë, stiluar nga Herve Moreau dhe ka mbërritur enkas në Tiranë, për Orindën”, – shprehet sipërmarrësja e Geraldina Sposës, Marçela Lati.
Ndryshe nga të gjitha nuset që vellon e mbajnë mbi kokë, Orinda mbante një pelerinë, që i jepte madhështinë e duhur një fustani në formë sirene, madhështi që u vu re gjatë parakalimit përkrah së atit drejt altarit.
Për artisten e grimit Eva Dibra, ka qënë e lehtë përshtatja e grimit dhe stilimit të flokëve tek Orinda, Portreti i saj, nuk kanë nevojë për shumë grim për të shkëlqyer. Dje Orinda, thjeshtë ishte e mrekullueshme.
Një elegancë më vete ishte dhe kostumi i Turjanit, i cili mbante firmën e stilistit të njohur Italian për veshjet e ceremonisë, Carlo Pingatelli. Kostumi kishte prerje moderne. Jeleku dhe gravata ishin zëvëndësur nga brezi dhe papioni, rikthim modern ky në veshjet e ceremonisë së dhëndurve.