Kryeministri Edi Rama dhe kryebashkiaku Erion Veliaj ishin në Qytetin Studenti ku inspektuan punimet në hapësirat e përbashkëta në tre prej konvikteve ndërsa u takuan dhe me studentë. Me të rinjtë kryeministri diskutoi për Kampusin e Universitetit.
Edi Rama: Është një projekt shumë kompleks, shumë ambicioz, kemi problem serioz rimarrjen e hapësirave sepse një pjesë e hapësirave janë të abuzuara nga kohët e mëparshme me kthime pronash që nuk duhet të kishin ndodhur që janë bërë dhe në shkelje të ligjeve ekzistuese sepse në mjediset shkollore apo sportive edhe ligji i atëhershëm i kohës e ndalonte kthimin e pronës dhe nga ana tjetër janë bërë abuzime të mëdha me godinat, që i takonin Qytetit Studenti dhe që janë privatizuar, gjë që lidhet me funksionimin e gjithë projektit. Kështu që po përgatisim dhe gjithë inventarin e nevojshëm për shpronësimet. Ndërkohë që projekti i ndërtimit të hapësirave të reja, qoftë të natyrës rekreative, qoftë të natyrës akademike është duke u zhvilluar, duke u realizuar.
Ndërkohë kryetari i Bashkisë tha se ndërtimi i shkollës Kodër-Kamëz nuk do të ketë kthim, pasi do ti shërbejë banorëve të zonës.
Me studentët kreu i shtetit dhe ai i bashkisë diskutuan dhe për kartën e studentit që shumë shpejt do të realizohet për ta.
