Edhe Irani garantues i armëpushimit në Siri
Përfundoi sot edhe takimi i tretë i bisedimeve për paqen në Siri, që u zhvillua në kryeqytetin e Kazakistanit, Astana.
Palët janë dakordësuar që, krahas Turqisë dhe Rusisë, edhe Irani të jetë garantues i armëpushimit.
Zëvendësministri i Jashtëm i Kazakistanit, Akilbek Kamaldinov lexoi deklaratën përfundimtare në hotelin ”Rixos” për takimin mes delegacioneve të Turqisë, Rusisë dhe të Iranit.
“Palët kanë theksuar vendosmërinë në çështjen e forcimit të armëpushimit. Janë dakordësuar për raportimin ndaj njëri-tjetrit për shkeljet e armëpushimit, mundësimin e pakësimit të numrit të shkeljeve si dhe për të rritur efektivitetin e mekanizmit vëzhgues tripalësh”, tha Kamaldinov.
Ndër të tjera është vendosur që të punohet për mbrojtjen e veprave historike në Siri që ndodhen në listën e trashëgimisë botërore të UNESCO-s.
