Monedha europiane ka hyrë në një trajektore rënëse, e cila nuk pritet të ndalet.
Këtë javë në tregun ndërkombëtar një euro u barazua me dollarin amerikan, ndërsa në tregun vendas zhvlerësimi nuk ndalet. Frika për një recesion të mundshëm në zonën euro duket se janë sinjalet që monedha europiane nuk pritet ta rimarrë veten shpejt.
Arjan Kadareja, ekspert ekonomie i ftuar në E-ZONE thotë se zhvlerësimi kundrejt lekut do të vijojë.
Euro kundrejt dollarit është zhvlerësuar 12%, ndërsa ndaj lekut vetëm 3%. Në gjykimin tim nuk është një zhvlerësim i madh, por është një zhvlerësim gradual që po ndodh. Natyrisht edhe banka e Shqipërisë ndërhyn, sepse plotëson objektivat e rezervës valutore. Gjithsesi kjo tendencë reflekton mendoj unë përmirësimin e situatës së turizmit dhe në përgjithësi të shërbimeve që ofron Shqipëria. Euro do të jetë në mbrojtje ndaj lekut. Pra leku do të vijojë mbivlerësim gradual edhe në vijim, – u shpreh Kadareja.
Këtë javë një euro në tregun vendas u këmbye me 117 lekë.
