Kriza ekonomike që po prodhon pandemia do të sjellë efekt edhe në mospagesën e kredive nga individët apo bizneset. Për të shmangur rritjen pa kufi të penaliteteve që aplikohen në raste të tilla, Banka e Shqipërisë vendosi të ndërhyjë në treg, duke përcaktuar një limit si për kamatvonesat, ashtu edhe për normën e interesit që do të aplikohet nga bankat dhe insitucionet financiare jo bankare.
“Pandemia është një shkak madhor që do të detyrojë një pjesë të individëve të mos e paguajnë kredinë. Ndaj për të mos e bërë këtë hua të papagueshme, ne vendosëm të ndërhyjmë për të përcaktuar një limit si në normat e interesit, ashtu edhe në penalitete që do të aplikohen për çdo kredi të papaguar, duke shmnagur në këtë mënyrë rritjen pa kufi të kosotove për kredimarrësin. Penalitetet në rast mospagese nuk do të kalojnë 30% të shumës së mbetur pa paguar”, shpjegon drejtori i Mbikëqyrjes në Bankën e Shqipërisë, Deniz Derralla në emisonin “E-ZONE”.
Këto ndryshime prekin kredinë konsumatore, qiranë financiare, overdraftet si dhe kartat e kreditit. Qëllimi i këtyre ndryshimeve të propozuara nga BSH është mbrojta e konsumatorit, i cili prej vitesh është penalizuar nga norma të larta interesi nga bankat dhe insitucionet financiare jo bankare, duke shkaktuar në jo pak raste edhe drama social-ekonomike në familjet shqiptare.
“Një pjesë e penaliteteve apo komisonet në këto kredi të disbursuara nuk ishin përfshirë në normën e interesit për klientët. Nëse ato do të llogariteshin dhe në këtë indeks, normat e interesit do të ishin dyfish më të larta”, sqaron Derralla.
Vendoja e kufirit për normat e interesit i adresohet më së shumti insitucioneve financiare jo banka, ndërsa penalitetet lidhen me bankat, si dhe me kompanitë e mbledhjes së kredive të këqija.
