Është kohë pushimesh. Shumë qytetarë i kanë prerë biletat për të kaluar pushimet jashtë vendit, ndërsa të tjerë mund të jenë në proces.
Por që të mos keni surpriza, me spostime dhe anulime fluturimesh, duhet të ndiqni këshillat e agjentëve të udhëtimeve. Disa shtete si Italia, Franca dhe Gjermani po zhvillojnë greva aeroportuale, duke sjellë një efekt zinxhir në trafikun ajrorë.
Këshilla jonë e parë është që zgjidhni destinacionet me fluturime direkte. Jo me transit. Edhe po u vonua nisja, nuk ka efekte. Këshilla e dytë është që edhe nëse fluturimi është me traznit, mundësisht të jetë brenda të njëjtës kompani, e cila mban përgjegjësi për anulime apo spostime të fluturimeve.
Ndërsa në rastin e tretë kur tranzitin nuk e shmangni, të paktën zgjidhni orare të gjata tranziti. Vetëm në këtë mënyrë do të minimizoni efektet e vonesave të mundshme, – sqaroi në një intervistë për “E-ZONE” Agim Mehmeti, agjent udhëtimesh.
Vonesat në fluturime duken të pashmangshme këtë verë, pasi që pas pandemisë ka një rritje të ndjeshme të fluturimeve, por ka ende staf të pa plotësuar në aeroporte të ndryshme të Europës.
