Janë arrestuar dy vëllezçrit e 19-vjeçares që vrau babain në Durrës. Pas hetimeve policia ka arrestuar 24-vjeçarin Hysen Meta dhe 22-vjeçarin Amarildo Meta.
Dyshohet se në qesen që ishte mbeshtjelle trupi i 50-vjeçarit, janë gjetur gjurmë gishtash të 24-vjeçarit.
Ishte vëllai i madh i 19-vjeçares ai i cili denoncoi i pari në polici zhdukjen e babait, i cili më pas u gjet i varrosur nga policia në Shënavlash të Durrësit.
Ndërkohë që disa orës pas ngjarjes që tronditi Durrësin, policia ka gjetur armën e krimit.
Pistoleta me të cilën Hygerta Meta, 19 vjeç, dyshohet se vrau të atin është gjetur nga forcat RENEA.
Çfarë iu gjet në duar, elementët që konfirmojnë se ishte Hygerta që ekzekutoi të atin me armë
Pistoleta u gjet në një moçal dhe sipas të dhënave, vajza ka treguar para hetuesve vendin ku e kishte hedhur atë.
Si ndodhi ngjarja
Gjakftohtë dhe pa asnjë shenjë pendese, Hygerta Meta, ka rrëfyer me detaje si kreu vrasjen e të atit. Në dëshminë e dhënë para hetuesve, 19-vjeçarja nuk fsheh mllefin ndaj babait, të cilin e vrau me armën e tij të punës.
Urrejtja që përfundoi në tragjedi, sipas saj, i ka “rrënjët” që në vegjëli. Siç ajo ka rrëfyer, viktima, Pëllumb Meta ishte një kryefamiljar shumë autoritar dhe çdo vendim në familje merrej vetëm nga ai, duke mos pranuar mendimin e askujt tjetër.
E reja rrëfeu se ngjarja ndodhi pas një zënke të radhës me të atin, pasi ky i fundit kishte marrë vendimin për ta martuar edhe pse ajo nuk ishte dakord.
E gjithë ngjarja, sipas dëshmisë së saj ka ndodhur në kasollën e bagëtive, ku me një plan të mirëmenduar, ajo e ka qëlluar të atin me armë zjarri. Pas krimit e ka mbështjellë me një çarcaf pastaj me fasho e në fund me qese. Armën e krimit shprehet se e hodhi buzë detit.
Hygerta Meta, 19 vjeç, u prangos nga uniformat blu të Durrësit si e dyshuar kryesore për vrasjen e babait të saj. Ngjarja e rëndë tronditi mbarë opinionin publik, teksa kronologjia e krimit fsheh ende shumë mister mbi mënyrën se si vrasja mund të jetë kryer.
Denoncimi si i zhdukur
Më datë 13 shkurt, djali i kryefamiljarit të vrarë, u paraqit para uniformave blu për të kërkuar ndihmë në gjetjen e të atit. Pëllumb Meta kishte humbur kontaktet me familjen dhe sipas 25-vjeçarit askush nuk kishte asnjë informacion mbi fatin e tij.
Hetimet e policisë
Për të paktën 10 ditë, viktima rezultonte i zhdukur, teksa policia e kërkonte. Mosdhënia rezultat e kërkimeve nxiti grupin hetimor të zgjeronte e thellonte hetimet, duke përfshirë edhe vetë familjen. Pas një hetimi të hollësishëm, grupi hetimor gjeti trupin e pa jetë të 50-vjeçarin. Me plagë të marra nga arma e zjarrit, Pëllumb Meta ishte groposur në oborrin e banesës së tij, shumë pranë familjes që e kërkonte.
Zbardhja e së vërtetës dhe dëshmia e 19-vjeçares
Pas gjetjes së trupit, uniformat blu arrestuan vajzën e viktimës, si e dyshuara kryesore e ngjarjes. Ajo ka pranuar krimit, duke mos shfaqur shenja pendese e mos pranuar në asnjë moment se është ndihmuar nga dikush tjetër në kryerjen e vrasjes. Konfliktet e vazhdueshme në familje, sjellja autoritare e të atit dhe insistimi për ta martuar pa aprovim, ishin arsyet e renditura nga adoleshentja për krimin e rëndë. Ajo u rikthye e shoqëruar nga uniformat blu në vendngjarje për të treguar dhe njëherë dinamikën e vrasjes, teksa në pamjet e siguruara shfaqet krejtësisht e qetë para gropës ku varrosi të atin.
“Jam e lumtur që e kreva unë këtë punë dhe nuk pendohem që kam vrarë tim atë. Ai na ka torturuar dhe na i ka nxirë jetën. Mami dhe ne nuk kemi folur kurrë në familje. Për gjithçka fliste dhe vendoste babai. Ai nuk na pyeste kurrë çfarë dëshironim. Kur mori vendimin për martesën time aty erdhi fundi. Nuk dëgjoi çfarë unë doja. M’u mblodh një urrejtje për një kohë të gjatë. Ditën e ngjarjes nuk u konfliktuam fare. Mora armën që babi përdorte kur shkonte në punë si roje dhe e qëllova brenda kasolles së bagëtive. Pas krimit e kam mbështjellë me një çarçaf pastaj me fasho e në fund me qese. Armën e hodha buzë detit.”, deklaroi ajo.
Dyshimet mbi personat e përfshirë
Pas zbardhjes së ngjarjes, policia ka zhvarrosur trupin e 50-vjeçarit, i cili pritet t’i nënshtrohet ekspertizës mjeko-ligjore. Trupi duket të jetë e vetmja provë e kësaj ngjarjeje, pasi arma e krimit nuk është gjetur ende nga hetuesit. Hygerta deklaroi se armën e ka hedhur buzë detit, duke mohuar të jetë ndihmuar nga dikush tjetër. Megjithatë, ajo ka theksuar se në momentin e krimit nuk është konfliktuar me të atin, por vetëm sa ka “zbrasur mllefin” së bashku me plumbat drejt babait të saj. Plani i 19-vjeçares për të “hequr qafe” të atin duket i mirëmenduar, teksa hetuesve iu deshën ditë për të zbuluar ngjarjen. Fizikisht duket mjaft e vështirë që një vajzë e re të mundet të vrasë e më pas tërheq trupin e të atit, duke hapur një gropë e varrosur atë. E gjithë kjo skenë në oborrin e banesës, duke mos lënë asnjë provë pas dhe duke mos krijuar asnjë dyshim tek familjarët. Hetimet do të përfshijnë dhe persona të tjerë për të hedhur dritë mbi misterin e kësaj ngjarjeje.
Dëshmitë e të afërmve
Të afërm të familjes u shfaqën të tronditur nga ky krim. Ata e përshkruan vajzën si të qetë, teksa nuk fshehën habinë apo dyshimin se vajza mund të ishte protagoniste e një skenari të tillë. Sipas tyre, ajo ishte e sjellshme dhe shumë e urtë, ndaj nuk kishte shfaqur kurrë shenja agresiviteti. Krushku i 50-vjeçarit, me djalin e të cilit është martuar vajza e tij e madhe, ka folur për kamerat dhe është shprehur i tronditur për ngjarjes.Ai ka thënë se i njihte si familje të mirë, teksa për vajzën është shprehur se “nuk mbyt dot një pulë e jo më një njeri”./vizionplus.tv/
