E diplomuar për infermieri në Shqipëri, dënohet 22-vjeçarja që hyri ilegalisht në Britani

Një 22-vjeçare shqiptare është dënuar nga një gjykatë në Britaninë e Madhe me 13 muaj e gjysmë burg për posedim të dokumenteve false.

Shqiptarja që identifikohet si Ina Bufi u ndalua në muajin korrik të vitit të kaluar. Teksa udhëtonte me makinë, policët e kufirit në portin e Holyhead i kërkuan dokumentet. E reja shqiptare i dorëzoi një kartë identiteti dhe një patentë greke. Edhe pse në fillim insistoi që ishin origjinale, më pas pranoi se është qytetare shqiptare.

Bufi dëshmoi në gjykatë se ishte viktime e trafikimit në Britani. Por hetimet kishin vërtetuar se Ina Bufi nuk ishte trafikuar, por kishte hyrë vetë në Angli me dokumente të falsifikuara.

Ndërkohë, avokati i saj, Seamran Sidhu pohoi se ajo është infermiere e diplomuar në Shqipëri dhe se kishte planifikuar të kryente studimet Master.