Ju kujtohet si pushonim dikur? Sa pak gjëra kishim nevojë të kishim me vete? Kur celulari dhe fotot që postohen nuk ishin më të rëndësishme se vetë pushimet? Shijonim çdo moment të kaluar në det, argëtoheshim duke luajtur apo duke qeshur me grupin që na shoqëronte.
Me zhvillimin që ka marrë teknologjia koncepti i pushimeve ka ndryshuar, madje ato shfrytëzohen edhe për të nxjerr fitime nga shumë personazhe të njohur.
‘Instagrami’ bombardohet çdo ditë nga postime që lidhen me kremra plazhi, syze dielli, rrobabanjo, emra dhe lokacione hotelesh që bëhen 3 muaj përpara, por edhe gjatë sezonit.
Personazhet e njohur të ekranit, duke shfrytëzuar numrin e lartë të ndjekësve të tyre në rrjetet sociale përpara dhe gjatë pushimeve etiketojnë produkte nga më të ndryshme duke nxjerrë fitime apo duke përfituar qëndrimin falas në ambientet e hoteleve që reklamojnë.
Kjo është njëra anë e medaljes. Nga ana tjetër për ndjekësit në rrjetet sociale krijohet një kaos informacioni. Herë pas here duke u ndikuar nga këto reklama, njerëzit e thjeshtë blejnë produkte që në shumicën e rasteve kanë çmime të kripura dhe cilësi të ulët apo prenotojnë në hotele me kosto të papërballueshme për nivelin e jetesës në vendin tonë.
