Një alpinist austriak është shpallur fajtor për vrasje nga pakujdesia e rëndë, pasi partnerja e tij humbi jetën nga hipotermia gjatë një ngjitjeje dimërore në malin Grossglockner, maja më e lartë e Austrisë, në janar 2025.
Gjykata e dënoi alpisnitin , të identifikuar si Thomas P., me pesë muaj burg me kusht dhe një gjobë prej 9,600 eurosh. Viktima, Kerstin G., ndërroi jetë si pasojë e temperaturave ekstreme gjatë ngjitjes.
Në vendimin e saj, gjykata theksoi se mori në konsideratë faktin që i dënuari nuk kishte precedentë penalë, si dhe humbjen e një personi të afërt, duke i cilësuar këto si rrethana lehtësuese. U përmend gjithashtu presioni i madh publik dhe reagimet akuzuese në rrjetet sociale.
Gjykatësi Norbert Hofer, vetë alpinist me përvojë, deklaroi se Thomas P. ishte shumë i aftë në ngjitje dimërore, ndërsa partnerja e tij kishte shumë më pak eksperiencë. Sipas tij, çifti duhej të ishte kthyer pas për shkak të kushteve të vështira.
Gjatë procesit u dëshmua se në një rast të mëparshëm, në vitin 2023, Thomas P. kishte lënë vetëm një partnere tjetër gjatë një ngjitjeje në të njëjtin mal, kur ajo ishte e rraskapitur.
Sipas mediave austriake, trupi i Kerstin G. u gjet i varur në një faqe shkëmbore, pa doreza dhe me çizme të hapura, në kushte të motit ekstrem me erëra deri në 74 km/h dhe temperatura që ndiheshin si -20°C.
Prokuroria argumentoi se, si alpinisti më me përvojë, Thomas P. mbante përgjegjësinë kryesore për sigurinë dhe dështoi të kthehej pas ose të kërkonte ndihmë në kohë. Ai u deklarua i pafajshëm, shprehu pendesë dhe tha se ngjitjen e kishin planifikuar bashkë.
Sipas akuzës, ai nuk sinjalizoi për ndihmë, edhe pse një helikopter policie kaloi mbi zonë. Thomas P. kontaktoi autoritetet vetëm pas mesnate dhe më pas vazhdoi drejt majës, duke e lënë partneren pas.
Çështja ka shkaktuar debat të gjerë në Austri dhe në komunitetin ndërkombëtar të alpinizmit mbi kufirin mes rrezikut personal dhe përgjegjësisë penale. Vendimi mund të apelohet.
/vizionplus.tv
