3 shtetas janë arrestuar në flagrancë në kuadër të një operacioni të policisë për goditjen e aktivitetit të kontrabandimit të mallrave.
Në pranga përfunduan:
-G.Sh., 29 vjeç, banues në Shtiqen, Kukës.
-H. B., 59 vjeç, banues në Tiranë, me detyrë doganier në Doganën e Morinës.
-B. V., 47 vjeç, banues në Kukës, me detyrë doganier në Doganën e Morinës.
Arrestimi i shtetasit G. Sh., u bë pasi, në aksin rrugor Morinë – Kukës nga shërbimet e DVP, është ndaluar automjeti tip “Iveko” fugon mallrash, me drejtues shtetasin e mësipërm, i cili kishte të ngarkuara 267 pako lëndë plastike (materiale ndërtimi), pa dokumenta shoqëruese.
Pas veprimeve hetimore rezultoi se ky shtetas ka hyrë nga PKK Morinë, pa kryer detyrimet doganore.
Arrestimi i shtetasve H. B., dhe B. V., u bë pasi, duke qenë në detyrë, nuk kanë kryer veprimet për zhdoganimin e mallit.
Në cilësinë e provës materiale u sekuestrua mjeti së bashku me mallin.
