Me titull “Propozimi për përshtatshmërinë e miratimit të protokollit për pjesëmarrjen e Mbretërisë së Suedisë në NATO”, çështja pritet të diskutohet nga Komisioni përkatës i Asamblesë Kombëtare Turke të martën e ardhshme, më 26 dhjetor. Kjo është edhe dita që për botën perëndimore është dita e shkëmbimit të dhuratave.
Sipas një raporti të Deutsche Welle-s, në mbledhjen e Komisionit do të diskutohen 10 propozime legjislative për miratimin e marrëveshjeve ndërkombëtare , dhe subjekti i Suedisë është i dhjeti, pra i fundit. Vihet re se i gjithë procesi i diskutimit për temën e Suedisë zgjati saktësisht një muaj, pasi filloi më 16 nëntor.
Tashmë, ditët e fundit Ankaraja ka dërguar mesazhe se çështjes së Suedisë po i vjen fundi. Kryetari i Komisionit, Fuat Oktay tha se komiteti mund të mblidhet javën e ardhshme për të diskutuar protokollin dhe mund ta miratojë atë përpara se ta dërgojë atë në Asamblenë Kombëtare si një gjest i vullnetit të mirë.
Proceduralisht, pasi projektligji të miratohet nga Komiteti, ai duhet të hidhet në votim në Asamblenë Kombëtare dhe nëse miratohet, të nënshkruhet në ligj nga Presidenti Erdogan.
Ndërkohë në Uashington dy ditë më parë u zhvillua takimi i nivelit të lartë i delegacioneve turke dhe amerikane për çështjet e mbrojtjes.
Sipas Ministrisë së Mbrojtjes së Turqisë, në takimin që u zhvillua në një atmosferë pozitive dhe konstruktive, u zhvilluan negociata dhe shkëmbim mendimesh për mbrojtjen dypalëshe, trajnimin ushtarak dhe bashkëpunimin në fushën e mbrojtjes si dhe për sigurinë rajonale dhe ndërkombëtare.
Turqia prej kohësh është treguar ‘tekanjoze’ lidhur me rrugën e Suedisë drejt NATO-s, e cila e nisi këtë rrugëtim së bashku me Finlandën, por nuk e përfundoi në të njëjtën kohë. Shkak u bë bllokimi nga Turqia, e cila kërkoi largimin e grupeve terroriste në Suedi, të cilët në fakt konsiderohen si kritikë të Erdogan./vizionplus.tv/
