Durrës, tashmë një zyrë për certifikatat e pronësisë

Merr fund sorollatja e qytetarëve sa tek ALUIZNI e sa te Zyra e Regjistrimit të Pasurive, për t’u pajisur me certifikatën e pronësisë.Një grup pune me specialistë të drejtorisë së Aluiznit në Durrës dhe zyrave vendore të regjistrimit të pasurive në Durrës dhe Krujë në një takim të përbashkët kanë në firmosur marrëveshjen e përbashkët të krijimit të një sektori brenda ZRPP-së, për dhënien e certifikatave të pronësisë. Drejtori i Aluiznit në Durrës Flamur Gjuzi u shpreh se specialistët tanë më të mirë do të merren me të gjitha hallkat e procesit, pasi qytetarët kanë bërë pagesën përkatëse dhe ata do të paraqiten në hipotekë vetëm për të tërhequr certifikatën e pronësisë. Ky bashkëpunim trepalësh synon shmangien e sorollatjeve të qytetarëeve nga një zyrë në tjetrën. Rregjistruesi i ZVRPP-së së Durrësit Ani Dyrmishi tha se ne kemi përzgjedhur një grup pune me hartografë, azhornues dhe specialistë të IT-së për këtë qëllim. Në total në qarkun e Durrësit janë marrë 75 mijë deklarime nga qytetarët për legalizimin e tyre. Deri tani zyrat e Aluiznit në nivel qarku kanë dhënë 15 mije leje legalizimi, nga të cilat më shumë se 90 perqind e tyre kanë marrë edhe certifikatën e pronësisë. Një nga problemet që ka dalë prej disa muajsh në Durrës është edhe legalizimi i rreth 10 mijë ndërtimeve që janë në zonën B të qytetit, të cilat me një vendim qeverie të vitti 2011 nuk mund të legalizohen. Kreu i Aluiznit ka kërkuar nga instancat më të larta që kjo VKM të zhbllokohet, pasi shumia e këtyre ndërtimeve gjenden në zonën e ish Kënetës.