Drogë në makinën e kryebashkiakes së PS/ PD: Gjithçka nën drejtimin e Edi Ramës
Brenda makinës së kryetares së Bashkisë së Roskovecit këtë të shtunë u gjet drogë.
Sipas disa mediave, makinën e Majlinda Bufit e kishte nipi i saj, i cili u kap me drogë. Për këtë rast reagoi edhe Partia Demokratike.
Enkelejd Alibeaj kërkoi llogari nga kryebashkiakja dhe nga kryeministri Edi Rama.
Në “Facebook”, ai akuzoi se gjithçka bëhet me lejen e Ramës. Akuza Alibeaj hedh edhe për policinë që sipas tij, e fsheh ngjarjen.
“Nën drejtimin e Edi Ramës, drogën mund ta bësh me makinën e Ministrit të Brendshëm, por mund ta bësh edhe me makinën e kryetarit të Bashkisë. Mjafton të kesh garancitë e Edi Ramës se nuk do të shkarkohesh dhe droga derdhet lumë me makinat e shtetit. Çfarë po bën Majlinda Bufi? Kryebashkiakja ilegjitime e Bashkisë së Roskovecit akoma nuk e ka dënuar aktin e trafikut të drogës me makinën e saj nga nipi i saj. Kryebashkiakja ilegjitime e Edi Ramës nuk mohon dot atë që ka dalë në pazarin e Roskovecit me kohë. Ajo përdoret dhe u shërben disa trafikantëve të drogës, njësoj si shefi i saj në Tiranë dhe si shumë homologë në bashki të tjera të vendit. Çfarë bën policia në këtë rast? A e ka marrë në pyetje kryebashkiaken për trafikun e drogës nga nipi i saj me makinën e saj? Ajo që dimë deri tani, është se policia as që e ka bërë publik faktin, siç nxiton për raste të tjera, kur pushteti i Edi Ramës nuk implikohet drejtpërsëdrejti. Çfarë bën kryeministri? A e shkarkoi ai kryebashkiaken e Roskovecit?”
Në fund, demokrati nënvizoi se nga Edi Rama nuk mund të presësh që të shkarkojë kryebashkiaken sepse diçka të tillë nuk e ka bërë as më parë.
