“Drejtësia është pavarësuar në një shtrat të përgjakur”, Rama: I dhamë shpatën gjyqësorit, historia do të mbajë mend vetëm emrin e PS

Prej orës 10:00 në qytetin bregdetar të Durrësit te “Melia”, po zhvillohet asambleja e PS me fokus zgjedhjet e brendshme të partisë dhe përgatitjet për zgjedhjet vendore të 2027-ës.

Gjatë fjalës së tij në Asamble, kryesocialisti Edi Rama u ndal te reforma në drejtësi.

Rama theksoi se reforma në drejtësi duhet të shihet si rezultat i punës së Partisë Socialiste. Ai u shpreh se PS-ja ka hapur një “shteg historik për drejtësinë” duke respektuar plotësisht autonominë e pushtetit gjyqësor dhe duke vepruar me vendosmëri në funksion të reformës.

Kryeministri nënvizoi se asnjë tjetër nuk ka pasur guximin të ndërmarrë një hap të tillë përpara Partisë Socialiste.

Rama: Është shumë e rëndësishme që të adresojmë tema të cilat marrin rëndom drejtime të paditura nëse lihen në rrjedhën e lirë të furnizimit dhe të vlimit të 700 tenxhereve mediatike dhe politike, duke filluar nga tema e drejtësisë. Është një temë ku askush dhe për asnjë arsye nuk mund të na vërë në diskutim lidershpin si forcë politike, vullnetin si forcë politike dhe vendosmërinë si trupë udhëheqëse e Shqipërisë në raport me gjithçka që ka ardhur pas kalimit të Reformës në Drejtësi dhe gjithçka që presim të vijë më tej. Ne kemi bërë atë që nuk e ka bërë askush, nuk e ka marrë guximin ta parafytyrojë askush para se ne të merrnim mandatin e parë. Kemi hapur një shteg historik për drejtësinë dhe e kemi hapur duke u tërhequr plotësisht nga territori i pushtetit gjyqësor.

Më tej Rama theksoi rëndësinë e një sistemi gjyqësor të pavarur dhe profesional për funksionimin e një demokracie të shëndoshë.

Ai u shpreh se sot askush nuk mund të mohojë pavarësinë e drejtësisë, duke iu përgjigjur akuzave se mazhoranca ka kapur pushtetin gjyqësor.

Shefi i ekzekutivit theksoi se Partia Socialiste ka dorëzuar shpatën e gjyqësorit te pushteti gjyqësor.

Rama: Sot mund të thuhet gjithçka për çdo gjë, por askush nuk mund të japë fakte për mungesën e pavarësisë së drejtësisë. Drejtësia sot është e pavarur dhe kjo është pak, sepse një drejtësi e pavarur nuk është e mjaftueshme për të garantuar një demokraci funksionale dhe një shtet të së drejtës. Drejtësia duhet të jetë e pavarur, e paanshe dhe profesionale. Në këto të tjerat ka shumë për të bërë akoma. Drejtësia jonë është pavarësuar në një shtrat të përgjakur dhe të ndryrë. Në shtratin e përgjakur dhe të ndryrë që për 100 e ca vite nuk ka qenë e lirë dhe e pavarur. E paanshme jo e jo. Prandaj nuk ka të bëjë fare me ne, sepse ne e kemi dorëzuar shpatën e pushtetit gjyqësor tek pushteti gjyqësor. Historia do të mbajë mend vetëm një emër, Partinë Socialiste të Shqipërisë.