Presidenti i SHBA-së Donald Trump vijon të thellojë ngërçin e krijuar në vend pas mbylljes së pjesshme të qeverisë. Ai këmbëngul se zgjidhja për t’i dhënë fund problemit janë negociatat dhe financimi për ndërtimin e murit në kufi me Meksikën.
Më herët Trump vendosi shtyrjen e udhëtimeve të kreut të Dhomës së Përfaqësuesve, demokrates Nancy Pelosi, drejt Brukselit dhe Afganistanit.
Administrata e Trump e justifikoi këtë duke thënë se Pelosi duhet të qëndrojë në SHBA dhe të vazhdojë negociatat për t’i dhënë fund bllokimit të qeverisë.
Në letrën drejtuar demokrates së lartë të Dhomës së Përfaqësuesve Presidenti Trump shkruan:
“Për shkak të mbylljes së qeverisë, më vjen keq t’ju informoj se udhëtimi juaj në Bruksel, Egjipt dhe Afganistan është shtyrë. Do ta riplanifikojmë këtë udhëtim shtatë-ditor kur të ketë mbaruar mbyllja e qeverisë”.
Anulimi i fluturimeve nga Trump ndodhi pak orë para se shefja e Dhomës së Përfaqësuesve të nisej në udhëtim.
Donald Trump kërkon financimin me 5.7 miliardë dollarë për të ndërtuar murin përgjatë kufirit SHBA-Meksikë, por demokratët vazhdimisht e kanë refuzuar një gjë të tillë.
E ndërsa ligjvënësit amerikanë janë në kaos, mediat shkruajnë se mbyllja e qeverisë mund të zgjasë ende, ndërsa punonjësit rrezikojnë të humbasin edhe pagën e pagën e tyre të dytë.
