Presidenti amerikan Donald Trump e bëri të qartë në Rijad të Arabisë Saudite se SHBA nuk janë në luftë me Islamin. Në një fjalim në samitin e liderëve të 55 vendeve të rajonit, ai e përshkroi luftën kundër Shtetit Islamik si betejë mes të mirës dhe të keqes dhe u kërkoi shteteve me shumicë muslimane të shtojnë përpjekjet për të mposhtur terrorizmin.
“Kjo nuk është një betejë mes besimeve të ndryshme, sekteve të ndryshme, apo civilizimeve të ndryshme. Kjo është një betejë mes krimineleve barbarë që duan të shkatërrojnë jetën njerëzore dhe njerëzve të ndershëm të të gjitha besimeve, që duan ta mbrojnë atë. Kjo është një betejë mes të mirës dhe të keqes.”
Tonet në fjalimin e tij ishin më të zbutura, krahasuar me retorikën e mëparshme ndaj muslimanëve, kur kishte kërkuar ndalimin përkohësisht të hyrjes së tyre në SHBA. Ai kërkoi që ata të bëjnë më shumë për zhdukjen e grupeve terroriste.
“Dëbojini ata, largojini terroristet, dëbojini terroristët, nga vendet tuaja të kultit, nga komunitetet tuaja, nga toka juaj e shenjtë dhe nga faqja e dheut. Vendet e Lindjes së Mesme nuk duhet të presin për fuqinë e SHBA-së, por të vendosin për të ardhmen që duan për veten, vendet dhe fëmijët e tyre.”
Arabia Saudite dhe disa shtete të Gjirit Persik që morën pjesë në samit janë përfshirë në luftën kundër Shtetit Islamik dhe do të firmosin një marrëveshje me SHBA për të koordinuar përpjekjet për shkurtimin e burimeve dhe parave për këto grupe. Fjalimi i kësaj të diele ishte përpjekja e parë e tij për të përmirësuar raportet me botën islame. Trump bëri përgjegjës Iranin për mungesën e stabilitetit në rajon dhe kërkoi izolimin e tij.
Trump ndodhet prej dy ditësh në Arabinë Saudite, ku u prit me kërcimin tradicional të shpatave. efekte
Ai u perpoq të ndiqte lëvizjet e kërcimit dhe të njëjtën gjë ka bërë edhe sekretari i Shtetit, Tillerson. Shefi i Shtëpisë së Bardhe firmosi me sauditet një marrëveshje tregtare me vlerë 350 miliard dollarë, ku përfshihet edhe marrëveshja me e madhe e tregtisë së armëve në historinë amerikane.
