Bien në pranga një person në Lezhë, pasi dyshohet se kundërshtoi me dhunë punonjësit e Policisë Rrugore.
Ngjarja ka ndodhur sot në aksin rrugor Lezhë-Mabë.
Shërbimet e Policisë Rrugore, i kanë dhënë shenjë ndalimi për arsye se kishte kryer parakalim të gabuar dhe në momentin që punonjësit e Policisë Rrugore po i komunikonin shkeljen dhe do ti vendosnin masë administrative, ky shtetas ka dalë nga makina dhe ka dhunuar fizikisht punonjësen e Policisë.
Pas ndërhyrjes së menjëhershme të kolegut dhe të shërbimeve që shkuan në ndihmë të tyre, 42-vjeçari është prangosur dhe shoqëruar në ambientet e Komisariatit të Policisë Lezhë, ku në përfundim të veprimeve të para hetimore, u bë arrestimi në flagrancë për veprën penale “Kundërshtimi me dhunë i punonjësit të policisë së rendit publik”.
Në pranga ka rënë E.V., 42 vjeç, banues në Manati, Lezhë.
Materialet hetimore iu referuan Prokurorisë së Rrethit Gjyqësor Lezhë për veprime të mëtejshme.
