Presidenti Ilir Meta ka paralajmëruar deputetët që mos të tentojnë të votojnë sot ndryshimet në Kodin Zgjedhor. Sipas tij, ai që hedh poshtë marrëveshjen e 5 qershorit në Këshillin Politik, pengon integrimin evropian.
Në një konferencë për shtyp me kreun e Bosnje Hercegovinës, kreu i shtetit deklaroi se do të publikojë emrat e të gjithë atyre që do të votojnë ndryshimit kushtetuese dhe se do të marrin përgjegjësi individuale.
“Të ashtuquajturit mazhorancë, dhe të ashtuquajturit opozitarë nuk duhet t’iu shkojnë në mend të mbyllin derën evropiane të Shqipërisë. Sot, ai që ngre doren për të prekur 5 qershorin, ai ngre dorën kundër integrimit evropian. Ai që vendos kusht pushtetin e partisë mbi interesin kombëtar, kushdo që ngre dorën do ketë përgjegjësinë individiale, morale e politike dhe pasojën që do të ketë në vend kjo përmbysje e pabesë tinzare. Presidenti do të publikojë gjithë emrat e atyre që do të bëjnë këtë përpara gjithë shqiptareve. Dhe kush janë ata që duan të kthejnë Shqipërinë 30 vjet pas për të mbyllur një derë që nuk ka Zot në botë ta mbylli. Presidenti do të bëjë atë që ka bërë gjithmonë. Presidenti do tregojë që Evropa është në zemrat e tyre dhe Evropa nuk është vetëm euro, në radhë të parë është liri, dinjitet dhe perspektivë. Dhe të gjithë e kanë në dorë nëse janë me demokracinë dhe për Shqipërinë”, theksoi Meta.
Meta përçoi mesazhin se miratimi i ndryshimeve në Kodin Zgjedhor do të ketë një faturë shumë të madhe historike dhe individuale për të gjithë ata deputetë që do t’i votojnë.
