Lideri historik Sali Berisha mori besimin e demokratëve për të udhëhequr forcën politike më të madhe të opozitës në 4 vitet e ardhshme.
Pas rikonfirmimit në krye të partisë, ai mbaji fjalën e tij në selinë blu, ku një mesazh e pati edhe për kryeministrin e vendit, Edi Rama.
Berisha deklaroi se demokratët do të vazhdojnë betejën politike deri në largimin e Ramës nga pushteti, ndërsa e cilësoi atë “një kufomë politike”.
“Siç votuam të lirë sot, do votojnë shqiptarët nesër. Ky është betimi ynë. Ndaj dhe Edi Rama, dije mirë se për këtë ushtri 40-mijëshe, ti ke zero legjitimitet”, u shpreh Berisha.
Në fjalën e tij, lideri demokrat akuzoi qeverinë për deformim të zgjedhjeve, ndërsa shtoi se opozita do të vazhdojë përballjen politike.
“Mendove se me 11 maj fitove. Buzëqeshjen ta ngrimë muaj më parë dhe prej muajsh kalon nga skena në skenë gjysmë i vdekur, gjysmë i gjallë. Kufomë politike. Ndaj dhe fundin e ke të shpejtë”, deklaroi Berisha.
Ai u shpreh gjithashtu se Partia Demokratike mbetet “parti e votës së lirë” dhe se demokratët do të vazhdojnë betejën për, sipas tij, rikthimin e zgjedhjeve të lira dhe të ndershme në vend.
