“Sot nis e përpjeta e fundit drejt Evropës”.
Kështu u shpreh kryesocialisti Edi Rama gjatë çeljes zyrtare të fushatës në sheshin “Skëndebej”. I bindur në fitoren e 11 majit, Rama premtoi se do ta ngjisin flamurin shqiptar në këndin e Evropës, aty ku i takon.
Rama: Para nesh është vetëm një datë, 11 maji, e afërt sa 30 mëngjese dhe pas saj është vetëm një mandat i gjatë 4 vjet për ta fituar bastin historik. Mos e harroni. Së bashku me ju, në një marshim të fundit drejt Evropës. Sot na ka zgjedhur ne fati për t’i dhënë shtysën e fundit gurit të pavarësisë, lirisë, barazisë para ligjit, duke mos e lënë më të rrokulliset, por duke e vendosur një herë e mirë në këndin e ndërtesës evropiane. Atu ku do të ngjisim edhe flamurin më të bukur në botë. Nuk ka në Ballkan një popull të dytë si arbërori që në shekujt e pasosur dhe raskapitës të jetë ngulur në majat e një shkëmbi për t’i mbijetuar gjithçkaje.
Prandaj dhe nuk ka në Ballkan komb tjetër që të jetë i njehsuar me ndjenjën e Evropës. Duke iu dhënë asaj Evrope dhe duke u ndjerë e saj në të gjithë tërësinë e vet, Shqipëria ka mundur të fshehë brenda vetes në shekuj thelbin e vet perëndimor, ta ruajë atë përgjatë çdo persekutimi apo prapakthimi ose arratisje drejt lindjes, ta nxjerrë atë të gjallë nga izolimi më i egër që ka njohur bota komuniste dhe ta kthejë në rrugën e pandalshme të bashkimit me Evropën./vizionplus.tv
