Gazetari i Vizion Plus, Bepin Kolvata mëson detaje të reja nga ngjarja e ndodhur mbrëmjen e djeshme në aksin Prekal-Postribaj, ku 43-vjeçari Çel Shabaj mbeti i plagosur me armë.
Shabaj ishte nisur për të marrë pjesë në një dasmë, por një plumb në këmbë ja pamundësoi pjesëmarrjen.
Lexo edhe :
Related Posts
Ngjarja ndodhi mbrëmjen e 13 gushtit rreth orës 20:40, një njësinë administrative Postribë në Shkodër.
Shabaj u dërgua me urgjencë në spitalin rajonal të Shkodrës me një autoambulancë të shërbimit kombëtar të urgjencës dhe pas dhënies së ndihmës nga bluzat e bardha rezulton jashtë rrezikut për jetën.
Ndërkohë policia menjëherë pas plagosjes arrestoi autorin e dyshuar, shtetasin Kristjan Kakija, ku efektivët arritën t’i sekuestrojnë edhe armën.
Bashkë me autorin, të shoqëruar janë edhe dy persona të tjerë që ndodheshin në automjet me të.
Shtetasi Çel Shabaj po dilte nga banesa e tij në Postribë dhe në atë moment ka qenë duke ardhur nga Prekali në drejtim të Postribës autori i dyshuar së bashku me dy shokët.
Në atë moment ka nisur një debat mes tyre se kush duhej të kalonte.
Sipas burimeve nga grupi hetimor shtetasi Kristjan Kakija pasi është larguar vetëm disa metra, është kthyer edhe njëherë dhe ka nxjerrë armën duke plagosur 43-vjeçarin.
Në atë moment kanë ndërhyrë pjestarë të tjerë të fisit Shabaj që ndodheshin aty afër të cilët janë përfshirë në një përleshje fizike mes tyre.
Një kushëri i të plagosurit ka arritur që në ato momente t’ia heq armën nga dora autorit të dyshuar i cili më pas është larguar nga vendi i ngjarjes.
Pak minuta nga plagosja policia përmes forcave “Shqiponja” arriti që të arrestojë shtetasin Kristjan Kakija duke sekuestruar edhe armën e dyshuar, tip pistoletë.
Policia dhe prokuroria e Shkodrës vijojnë hetimet për zbardhjen e plotë të kësaj plagosje./vizionplus.tv
