U mbyllën mbrëmë aktivitetet e organizuara nga Bashkia Shkodër në bashkëpunim me Qendrën Kombëtare të Veprimtarive Tradicionale në kuadër të Ditëve të Trashëgimisë Kulturore Europiane dhe Kombëtare, pjesë e së cilës është shpallur edhe “Ahengu Shkodran”, si një ndër shtatë kryeveprat e trashëgimisë shpirtërore kombëtare.
Aktivitetet u zhvilluan në oborrin e Shtëpisë Muze të rilindasit Pashko Vasa, në shtëpinë muze të familjes Çeka, për t’u finalizuar mbrëmjen e të hënës në Muzeun Historik, Banesa “Oso Kuka” me një koncert të traditës, i cili zhvillohet nga Bashkia Shkodër për të shtatin vit me radhë, me pjesëmarrjen e artistëve të rinj dhe të afirmuar.
“Ahengu Shkodran”, e shpallur si një ndër shtatë kryeveprat e trashëgimisë shpirtërore kombëtare, erdhi mbrëmë tek publiku i pranishëm me të gjithë elementët e tij, duke risjellë në vëmendje pasurinë e çmuar që qyteti ynë përçon tek brezat e rinj.
