Dita e dytë e Samitit të NATO-s, diskutohet për Afganistanin
Në ditën e dytë të samitit të NATO-s i cili po zhvillohet në Bruksel, liderët e 29 vendeve anëtare do të kenë në qendër të bisedimeve konfliktin në Afganistan.
Presidenti afgan, Ashraf Ghani, do të jetë i pranishëm dhe sekretari i përgjithshëm i aleancës shpreson që blloku të bjerë dakord për të financuar forcat afgane të sigurisë deri në 2024.
Kryeministrja britanike Theresa May, ka konfirmuar se Britania e Madhe do të dërgojë edhe 440 trupa shtesë në Afganistan. SHBA po ashtu do të dërgojë 3 mijë forca për të mbështetur afganët, duke e çuar numrin total në 15 mijë.
Tema të tjera diskutimi në samit do të jenë edhe lidhjet e aleancës me Gjeorgjinë dhe Ukrainën, vende që kërkojnë t’i bashkohen NATO-s. Gjithashtu gjatë ditës priten të zhvillohen takime dypalëshe mes udhëheqësve.
Në drekë do të ketë një takim mes Kryeministrit grek Aleksis Cipras dhe presidentit turk Rexhep Taip Erdogan. Ndërkohë, Presidenti i Shteteve të Bashkuara të Amerikës Donald Trump pritet të zbusë tonet përpara se të largohet për në Britaninë e Madhe. Një ditë më pare Trump akuzoi Gjermaninë se kishte krijuar varësi nga Rusia pas marrëveshjes për tubacionet e gazit.
