Studentët do të dalin në protestë edhe këtë të martë. Në ditën e tyre të pesëmbëdhejtë, ata do të mblidhen fillimisht në fakultetet respektive dhe më pas do të kryejnë ritualin duke marshuar në drejtim të Kryeministrisë.
Por në protestën e kësaj të marte, studentët nuk i kanë kursyer as mesazhet paralajmëruese në drejtim të politikës dhe kryesisht opozitës.
Në faqen e tyre në internet, universiteti.info studentët përmes një mesazhi I kanë bërë thirrje Bashës dhe Kryemadhit që të mos guxojnë t’i afrohen protestës.
Ndërkohë, që nga ana tjetër të rinjtë kanë paralajmëruar se nuk do të ketë dialog me qeverinë në lidhje me 8 kërkesat e tyre.
Ata vijojnë të këmbëngulin se do të rikthehen në auditorët e universitetit vetëm pasi të plotësohen tetë kërkesat e tyre.
Në protestën e të hënës, studentët pas qëndrimit tek Kryeministria kanë bllokuar për tre orë rresht trafikun ne disa pika kyçe të Tiranës.
Ndërkohë një gjë e tillë është paralajmëruar edhe ditën e sotme, ku studentët teksa u kanë kërkuar falje qytetarëve për bllokimin e trafikut në faqet e tyre në internet, kanë deklaruar se do të mbajën hapur vetëm një korsi dhe do ta lirojnë rrugën vetëm për mjetet e emregjencës.
