“Disney” do të nisë një shërbim të ri transmetimi të mbështetur nga reklamat në SHBA, në muajin dhjetor, duke qenë se po kapërcen “Netflix”-in në garën për abonentë.
Ky shërbim planifikon të nisë jashtë SHBA-së vitin e ardhshëm.
Por “Disney” paralajmëroi se humbja e të drejtave të transmetimit për kriket në Indi do të zvogëlonte rritjen e abonentëve të saj në krahasim me parashikimet e mëparshme.
Ndërkohë, shërbimi i ri i financuar nga reklamat, do të faturohet ende me tarifën aktuale të abonimit prej 7,99 dollarë. Nga ana tjetër, tarifa për shërbimin pa reklama do të rritet në 10,99 dollarë në muaj.
Ekzekutivët thanë se nuk presin që rritja e çmimeve të shtyjë klientët në terma afatgjatë. “Disney” po sheh gjithashtu interes të madh nga kompanitë që shpresojnë të reklamojnë për shërbimin e ri.
“Disney” tha se kishte 221.1 milionë abonime në tre platformat e saj të transmetimit që nga 2 korriku.
Kjo është në kontrast me rivalin “Netflix”, i cili ka humbur klientët.
Firma, e cila zotëron gjithashtu platformën televizive “Hulu” dhe “ESPN+”, të fokusuar në sport, tha se kërkesa për produktin e saj “Disney+” mbetet e fortë.
Pandemia dha një nxitje për shërbimet e transmetimit si “Disney”, por lehtësimi i kufizimeve të Covid-19 nuk duket se po e pengon atë të tërheqë klientë të rinj.
Kompania shtoi 14.4 milionë abonime të “Disney+” në tremujor, shumë prej tyre jashtë SHBA-së. Kjo shifër ka tejkaluar parashikimet e analistëve.
