Në emisionin “Quo Vadis” të Pranvera Borakajt në Vizion Plus, është diskutuar buxheti i vitit të ardhshëm, që tashmë ka hapur shumë debate.
Florenc Dilaveri, ish-zv/drejtori i përgjithshëm i Tatimeve, tha se buxheti nuk adreson problematika të arsimit apo shëndetësisë. Po ashtu një pjesë që nuk adresohet është mbrojtja, që e ka buxhetin shumë të ulët.
“Të gjitha qeveritë buxhetet i konsiderojnë mrekulli, opozita i konsideron dështim. Nëse vazhdojmë me këtë qasje s’do jemi realistë.
Unë them që duhet të kemi një këndvështrim më ndryshe. Nëse do i referohemi ndërtimit, gjithë vitin e fundit ka një lloj stanjacioni në shitjen e pasurive të paluajtshme, sepse kaq është fuqia blerëse dhe çmimet kanë kaluar në shifra të paërpballueshme edhe për shtresën e mesme.
Unë mendoj që ndërtimi është një ndër industriutë, për mos të thënë industria kryesore ku kemi pastrimin e parave. Ata nuk vrasin mendjen nëse ndërtimi do të shitet me shpejtësi. Është pozitive që po investohet në infrastrukturë, por nëse dalin në konceptin e rrugëve 22 mln euro për km, jo vetëm që nuk kemi bërë gjë, por jemi një hap mbrapa. Ky buxhet nuk reflekton problemet që ka shëndetësia dhe arsimi, për të mos dalë te mbrojtja sepse kemi dhe atje probleme dhe nuk i afrohemi atij 2% që nuk e di si do veprojmë në vitin në vazhdim që do kthehet në normë”, tha Dilaveri. /vizionplus.tv
