Pas dorëheqjes së kryebashkiakut Dionis Imeraj, i cili iu bashkua listës së kandidatëve për deputetë në qarkun Dibër, tashmë bashkia që ai drejtonte është defakto pa kryetar. Prej vitit 2015, Bashkinë Dibër e kanë drejtuar tre kryetarë, asnjëri me mandat të plotë.
Në zgjedhjet e vitit 2015, Shukri Xhelili u zgjodh në krye të bashkisë më të madhe në këtë qark. Atij do t’i ndërpritej mandati pa u mbushur një vit nga marrja e detyrës, pas një videoskandali të publikuar në media.
Më pas, më 11 shtator të vitit 2016, në krye të Bashkisë Dibër, u zgjodh mjeku Muharrem Rama. Ky i fundit fitoi me një diferencë prej 4 mijë votash kundrejt kandidatit të PD, Sherefedin Shehu.
Në zgjedhjet lokale të vitit 2019, Partia Socialiste garon në Dibër me Dionis Imerajn, i cili mori detyrën si kryebashkiak me 6 gusht të 2019-ës. Por edhe ky, si dy paraardhësit e tij nuk e mbylli mandatin e plotë, pasi vetëm një ditë më parë dha dorëheqjen për t’u bërë pjesë e garës parlamentare të 25 prillit.
Detyrën e kryetarit do ta ushtrojë përkohësisht zëvendësi i Imerajt deri në zgjedhjet e parakohshme për këtë bashki. Por kush është ai apo ajo që zëvendëson Imerajn? Në fakt, deri një ditë më parë, mësohet se në Bashkinë Dibër ka patur vetëm një zëvendëskryetar dhe ajo ka qenë grua, Denisa Basha.
Por siç duket, ajo nuk ka qenë e besuara e ish-kryebashkiakut Imeraj, pasi mësohet se para se të firmoste dorëheqjen nga posti, ka emëruar zëvendës të tij Shkëlqim Murrja, i cili mbante detyrën e Shefit të Personelit.
