Dibër, zjarr në Vlashaj të Lurës, shkrumbohen dy shtëpi pushimi

Dy vatra të mëdha zjarri kanë përfshirë në fundjavë masivet pyjore në Bulqizë e Dibër. Dyshohet se dhjetë hektar pyje me pishë u dogjën në fshatin Vlashaj të Lurës. Për tre ditë me radhë banorët u përballën me zjarrin, ndërsa në ndihmë të tyre shkoi të dielën edhe ushtria.

Flakët e zjarrit shkuan në zonën e banuar të fshatit Vlashaj ku dogjën dy banesa. Për shkak të flakëve u dogjën krejtësisht dy banesat e familjeve Nezir e Xhelil Bucit, të cilat përdoreshin si shtëpi pushimi.

Fatmirësisht flakët nuk shkaktuan dëme në njerëz, por vetëm dëme të mëdha materiale.  Drejtues të Emergjencave Civile në Dibër thanë se vatra e zjarrit është vënë nën kontroll.

Edhe vatra e zjarrit në fshatin Mazhicë të Shupenzës është shuar e gjitha.