Edhe pse ka disa muaj që ka hyrë në fuqi moratoriumi i pyjeve, në Dibër situata është ndryshe. Pyjet e këtij qarku vazhdojnë të dëmtohen nga persona të cilët e shfrytëzojnë lëndën drusore për tregti. Gjatë kontrollit të ushtruar nga struktura “Roja e gjelbër” këtë të martë janë bllokuar tre automjete të ngarkuara me lëndë drusore të prera në mënyrë të paligjshme duke sekuestruar sasinë prej 10 metër kub lëndë Drusore “AH”. Policia ka proceduar penalisht në gjendje të lirë tre shtetas. Efektivët e Komisariatit të Policisë Dibër, në vendin e quajtur SMT rruga e Tominit, kanë ndaluar dhe bllokuar tre automjete që transportonin lëndë drusore që drejtoheshin nga shtetasit me iniciale B.D, H.T, I.L.
Të tre automjetet së bashku me drejtuesit e tyre janë shoqëruar në ambientet e Komisariatit të Policisë Dibër, ku nga veprimet e para hetimore rezultoi se këta shtetas e kishin prerë lëndën drusore në mënyrë të paligjshme me qëllim për ta shitur. Shtetasit B.D, H.T e I.L, janë proceduar penalisht dhe do ndiqen në gjendje të lirë nga ana e Prokurorisë për veprën penale “Prerja e paligjshme e pyjeve”, parashikuar nga neni 205 i Kodit Penal, ndërsa lënda drusore dhe automjetet u sekuestruan në cilësinë e provës materiale.
Dibër, vazhdon shkelja e moratoriumit të pyjeve
