Banorët e fshatit Brezhdan në Bashkinë e Dibrës janë mbledhur në protestë përpara Bashkisë, për shkak të mungesës së ujit të pijshëm. Fshati më i madh i Dibrës me mbi 800 familje vuan mungesën e ujit të pijshëm, dhe sot në pranverë furnizohen me deri në 1 orë ujë në ditë.
Edhe pse ekziston një ujësjellës, në fshat nuk ka rrjet të brendshëm shpërndarës, ndërsa furnizohen nga çezmat publike për çdo lagje. Banorët thonë se në këto çezma mbush uji kush është më i fortë në atë orar që vjen.
Një tjetër shqetësim për banorët e Brezhdanit janë kanalet e zeza që derdhen rrugëve të fshatit. Përmes fshatit kalon një kanal vaditës që fillon nga llixhat e Peshkopisë , në të derdhen kanalet e zeza të lagjes Kamen të qytetit mbetjet spitalore dhe mbeturinat e disa fshatrave në periferi të qytetit dhe të gjitha së bashku shpërndahen rrugëve të fshatit Brezhdan.
Banorët kërcënojnë se nëse kërkesat e tyre nuk merren parasysh do të dalin të protestojnë i gjithë fshati prej 800 familjesh dhe do të bllokojnë rrugën kryesore. Ato shprehen se do të bojkotojnë edhe zgjedhjet e ardhshme lokale.
