Meksika ka dislokuar rreth 10 mijë trupa për të frenuar valën e dhunës që shpërtheu pas vrasjes së një prej figurave më të kërkuara të botës së krimit, Nemesio Oseguera Cervantes, i njohur si “El Mencho”. Kreu i Jalisco New Generation Cartel (CJNG) u plagos gjatë një përplasjeje me ushtrinë në Tapalpa, në shtetin Jalisco, dhe vdiq gjatë transportimit drejt Mexico City.
Pas konfirmimit të vdekjes së tij, anëtarë të kartelit bllokuan rrugë në disa shtete, dogjën automjete dhe sulmuan objekte publike. Sipas autoriteteve, dhuna la dhjetëra të vrarë, përfshirë anëtarë të forcave të sigurisë, ndërsa disa të dyshuar u neutralizuan gjatë operacionit. Për “El Mencho” ishte shpallur një shpërblim prej 15 milionë dollarësh.
Situata krijoi panik edhe në zona turistike si Guadalajara dhe Puerto Vallarta, ku shkollat u mbyllën dhe dhjetëra fluturime u anuluan. Britania, Kanadaja, SHBA-të dhe Australia lëshuan paralajmërime udhëtimi.
Operacioni u mbështet me informacione inteligjence nga SHBA-të. Presidenti amerikan Donald Trump kërkoi intensifikim të luftës kundër karteleve, ndërsa presidentja e Meksikës, Claudia Sheinbaum, theksoi se asnjë forcë amerikane nuk mori pjesë drejtpërdrejt në aksion. Analistët paralajmërojnë se mungesa e një pasardhësi të qartë mund të sjellë përplasje të reja brenda kartelit.
/vizionplus.tv
