Dhuna e tre adoleshenteve në Fier ndaj bashkëmoshatares së tyre ktheu edhe njëherë në vëmendje gjendjen në të cilën ndodhet shoqëria shqiptare.
Por situata u rëndua edhe më shumë pas deklaratave të bëra nga Drejtori i Përgjithshëm i Policisë së Shtetit, Skënder Hita, i cili deklaroi sot se ka përjashtuar nga radhët e policisë efektivin që ka tentuar të fshehë ngjarjen, pasi dyshohet se ka qenë në një marrëdhënie të papranueshme me një nga vajzat dhunuese.
I ftuar këtë të enjte në “Quo Vadis”, në Vizion Plus, të moderatores Pranvera Borakaj, eksperti i sigurisë, Fatjon Softa, deklaroi se kjo ngjarje tregoi edhe njëherë se në çfarë gjendjeje është shoqëria shqiptare.
Pjesë nga biseda:
Borakaj: Raporti mes një oficeri policie dhe një prej vajzave dhunuese, sa normal është? Ngjarja u mbajt edhe e fshehtë?
Softa: Ngjarja është e rëndë. Më e rëndë bëhet kur në të përfshihet edhe një oficer policie, i cili jo vetëm duhet t’i evidentojë këto raste, por duhet të mbajë edhe qëndrim. Fakti që Hita ka thënë se ka pasur një marrëdhënie të papranueshme, nuk ka sqaruar me kë. Nëse do të kishim edhe rastin që ka pasur një marrëdhënie të papërshtatshme me një të mitur, do të kishim edhe një tjetër krim.
Borakaj: Duhet të ishte shterues me detajet.
Softa: Nëse e ëma e dhunueses nuk do të kishte mbajtur një qëndrim publik me ato deklarata, çështja mund të mbahej e fshehur. Edhe në rastin e parë kjo çështje nuk ka qenë e ekspozuar. Është rasti i dytë i përdorimit të dhunës. Dalja e videos, e cila shokoi opinionin, ktheu vëmendjen te publiku, duke treguar se nuk është një rast i izoluar. Dhuna në rrjetet sociale është kthyer në modë. Kujtojmë edhe një rast kur dy vajza që shërbenin ndaj një të moshuare ushtronin dhunë ndaj saj. Kjo tregon se ne, si shoqëri, kemi një problem serioz.
