Në një fshat të Devollit të sipërm ka lindur si inisiativë ndërtimi i gropave septike pranë banesave për të ndalur ndotjen e mëtejshme të lumit Devoll nga derdhja e ujrave të zeza.
Kjo inisiativë është ndërmarë në fshatin e njohur të Sinicës nga banori i saj Albert Hysolli. Ai prej kohësh u fliste bashkëfshatarëve për të ndërtuar gropa të tilla që ujrat e zeza mos derdhen në lumë dhe e tregoi me shembullin e vet duke e ndërtuar te shtepia. Ato që ka parë në Greqi si emigrant, kërkon ti zbatojë edhe në vendlindje duke synuar që kjo përvojë të përhapet gjerësisht.
‘Të gjitha fshatrat e Devollit pa përjashtim i derdhin ujrat e zeza në lumin Devoll. Vërtet që ujrat e zeza i largojnë me tuba në lume duke filluar nga Dardha e tek fshati i fundit’ thotë Albert Hysolli.
Ai shton se për ta verifikuar këtë fakt mjafton të shikohet lumi Devoll nga fshati Vishocicë e drejt burimit dhe konstatohet lehtë se cfarë katastrofë është gjendja.
Hysolli apelon me mesazhin se vetë banorët e kanë në dorë të ndryshojnë gjendjen e tyre, pa pritur shumë nga bashkia apo institucionet që tregohen indiferente për shkak të kostos së projekteve. Sinica si një nga fshatrat me më shumë tradita dhe kulturë në zonën e Devollit pretendon të marë zhvillim e ringjallje nga turizmi.
