Detaje nga atentati/ Plagosen në oborrin e banesës dy djemtë e Gentjan Bejtjes, 13-vjeçari në gjendje të rëndë

Dy djemtë e Gentjan Bejtjës, 13 dhe 8 vjeç, kanë mbetur të plagosur nga atentati i kryer gjatë natës në Krujë.

Banesa e Gentjan Bejtjes u sulmua me breshëri plumbash, ku si pasojë mbeti i vrarë Ramazan Sino, 29 vjeç. Të plagosur kanë mbetur dhe dy djemtë e atij që dyshohet të ishte objektivi i atentatit. Djali i tij 13-vjeçar mësohet se është në gjendje të rëndë për jetën.

Ndërkohë policia nuk ka ende asnjë gjurmë të autorëve. Vetëm disa momente pas atentatit, uniformat blu kanë gjetur një automjet të shkrumbuar, i cili dyshohet të jetë përdorur në ngjarjen kriminale.

Gentjan Bejtja është një emër i njohur për drejtësinë, pasi rezulton të jetë hetuar për vrasjen e kryekomisarit Dritan Lamaj, pasi u dyshua bashkë me Enver Stafukën, si një nga autorët e vjedhjes së makinës nga e cila u vra Lamaj, në shkurt 2013.