Një konflikt mes dy komshinjve për një turë drush ka përfunduar tragjikisht mbrëmjen e së enjtes në lagjen Vrapaj të Roskovecit, ku një 70-vjeçar ka humbur jetën pasi dyshohet se pësoi infarkt.
Sipas burimeve zyrtare të Drejtorisë Vendore të Policisë Fier, viktima është Baftjar Vrapi. Ngjarja ka ndodhur rreth orës 20:00, kur djali i tij është përfshirë në një konflikt fizik me komshiun për shkak të një ture drush.
Sipas të dhënave paraprake, 70-vjeçari ndodhej në banesë së bashku me bashkëshorten. Në momentin që ka marrë dijeni për konfliktin dhe ka tentuar të dalë jashtë, ai ka pësuar një infarkt, duke u rrëzuar në tokë.
Familjarët kanë njoftuar menjëherë urgjencën, ndërsa ambulanca e ka transportuar drejt Qendrës Shëndetësore të Roskovecit, ku mjekët kanë konstatuar vdekjen e tij.
Ndërkohë, banorë të zonës japin një version tjetër të ngjarjes. Sipas tyre, Baftjar Vrapi ndodhej në verandën e banesës dhe ka qenë dëshmitar i konfliktit mes djalit të tij dhe komshiut, përpara se të pësonte infarktin fatal.
Policia po vijon hetimet për të zbardhur plotësisht rrethanat e ngjarjes dhe për të sqaruar dinamikën e konfliktit që parapriu vdekjen e 70-vjeçarit. Palët e përfshira janë shoqëruar dhe po merren në pyetje, ndërsa në vendngjarje ndodhen shërbime të shumta policore.
/vizionplus.tv
