“Gjermania nuk e mbështet planin për ndryshimin e kufijve dhe duhet të bëjë më shumë presion për njohjen e Kosovës”. Kështu është shprehur deputetja liberale gjermane Renata Alt, gjatë një interviste për Deutsche Welle. Sipas saj, dialogu mes Prishtinës e Beogradit nisi në gjendje të paqëndrueshme.
Deputetja shtoi se ndryshimi i kufijve në Ballkan, është një lojë e rrezikshme që mund të ketë pasoja të paparashikueshme që nuk i merr dot me mend askush në këtë moment. Deputetja gjermane thotë se zhvendosja e kufijve nuk i zgjidh problemet nacionale. Ajo nënvizoi se vendet e Ballkanit kanë një rëndësi të madhe gjeostrategjike mes Europës dhe Azisë, prandaj duhet të jetë në interesin e Gjermanisë një rajon i sigurt.
