Deputeti demokrat, Helidon Bushati shprehet se për lotin e parë të Unazës së Madhe, janë shtuar papritur 5 miliardë lekë.
Sipas tij, këto para u dhanë për një punë tashmë të prokuruar një herë, duke shtuar se nëse nuk ka një ndryshim projekti për arsye madhore, çdokush me të drejtë mendon se 5 miliardë të shtuara janë paja e një qoke të re, në aferat e vjetra me Unazën e Madhe të Tiranës.
Bushati thekson se ARRSH duhet të përgjigjet nëse anulimi i parë i këtij loti është bere me qëllim për ta fituar oligarku që duhej ta fitonte që herën e parë, por që për arsye teknike nuk arriti.
“Është zbuluar sot në media, se për lotin e parë të Unazës së Madhe, janë shtuar papritur 5 miliardë lekë. Asnjë shpjegim përse në mënyrë të beftë, u dhanë edhe rreth 5 milionë euro për një punë tashmë të prokuruar një herë. Çfarë ndodhi vallë, cilat rrethana ndryshuan për një shtesë në buxhet në këto përmasa? Dyshimet e arsyeshme janë se kjo ka të bëjë me orekset në rritje të rilindjes për të përfituar sa më shumë nga pushteti. Autoritetet, Ministria e Infrastrukturës dhe ARRSH janë nën akuzë para këtyre të dhënave. Duhet transparencë dhe e menjëhershme. Nëse nuk ka një ndryshim projekti për arsye madhore, çdokush me të drejtë mendon se 5 miliardë të shtuara janë paja e një qoke të re, në aferat e vjetra me Unazën e Madhe të Tiranës. ARRSH duhet te përgjigjet nëse anulimi i parë i këtij loti është bere me qëllim për ta fituar oligarku që duhej ta fitonte që herën e parë por që për arsye teknike nuk arriti.”