Gjykata e Krimeve të Rënda dënoi me 10 vite burg Mikel Shallarin, i cili ekzekutoi në prill të vitit 2017 ish-komisarin Artan Cuku pranë apartamentit të tij në “rrugën e kosovarëve” në Tiranë. Ky dënim i ulët për Shallarin erdhi pasi Gjykata pranoi akt-marrëveshjen që e bën atë të penduarin e drejtësisë, duke shmangur automatikisht burgimin e përjetshëm.
Shallari rrëfeu për prokurorët e çështjes se porositësi i vrasjes së Cukut është Bledar Jambelli, person i cili është shpallur prej mëse dy muajsh në kërkim ndërkombëtar. Ndërkohë në kërkim është shpallur edhe Krostaq Leci, i cili dyshohet si ndihmës i Shallarit. Vrasja e Artan Cukut, u porosit nga Jambelli pasi ne vitin 2012 ish-komisari e arrestoi atë si person të përfshirë ne disa krime. Bledar Jambelli i cili njihet edhe me emrin Rikardo Muho, është i akuzuar edhe për dy vrasje të tjera të kryera në vitin 2006, por pavarësisht dyshimeve ai fitoi lirinë.
