Qeveria britanike refuzon rikthimin e kufizimeve për menaxhimin e pandemisë edhe pse mjekët kanë shtuar presionin në kushtet kur numri i infeksioneve të reja në javët e fundit është më i lartë sesa Franca, Gjermania, Italia dhe Spanja së bashku.
Mbretëria e Bashkuar po ashtu raportoi të martën 223 viktima, shifra më e lartë ditore që nga fillimi i muajit mars.
Kryeministri Boris Johnson i qëndron strategjisë së mbështetur plotësisht në vaksinimin e popullsisë por deri më tani vetëm dy të tretat e moshave të rritura kanë marrë të dyja dozat e vaksinës ndërsa fushata e imunizimit për moshat më të reja ka ecur me ritme shumë të ngadalta.
Ndërsa doza përforcuese e vlerësuar si thelbësore në politikën që po ndjek Boris Johnson, është injektuar në një nivel shumë të ulët në rang vendi.
Për më tepër, shumica e njerëzve mbi 40 vjeç në Britani u vaksinuan fillimisht me vaksinën Oxford-AstraZeneca, efikasiteti i së cilës kundër variantit Delta është treguar të jetë më i ulët se Pfizer dhe Moderna.
Një studim nga ekspertët e Shëndetit Publik zbuloi se mbrojtja kundër infeksionit ra nga 66 % në 47% pas 20 javësh, krahasuar me një rënie nga 90% në 70% për vaksinën Pfizer.
Ndryshe nga vendet e tjera në kontinentin e vjetër, Britania e Madhe në muajin korrik hoqi kufizimet e distancimit fizik, mbajtjen e maskës apo pasaportën shëndetësore, si dhe lejoi funksionimin me kapacitet të plotë për baret, restorantet dhe klubet e natës.
