“Deklaratat e Zaganit të pavërteta”

Akuzat publike të ish-oficerit të antidrogës Dritan Zagani se shefat e tij dhe njerëz te afërt te ministrit Tahiri kanë ndikuar në pushimin e hetimeve për persona të dyshuar për trafik të lëndëve narkotike, nuk janë të vërteta, çka ka sjelle pushimin e çështjes. “Vizion plus” siguron vendimin e Prokurorisë së Fierit, në të cilin thuhet se pas hetimeve të nisura kryesisht, rezultoi se akuzat e ngritura në media nuk përmbushin elementet e veprës penale, ndërsa, për një pjesë të tyre, fakti nuk ekziston. Hetimet janë fokusuar veçanërisht në personin e akuzuar për trafik me inicialet A.D, që Zagani pretendon se pavarësisht raportimit të aktivitetit të tij kriminal, mbi të nuk janë kryer hetime. Por nga mbledhja e informacioneve rezulton se Drejtoria per Trafikun ne Policinë e Shtetit dhe Prokuroria e Krimeve të Rënda, jo vetëm që kanë kryer hetime, por ato vijon ende. Kjo vërtetohet dhe përmes urdhrave për veprime policore, përgjimet parandaluese dhe vëzhgimeve të tjera policore. Gjithashtu nga këqyrja e korrespondencës qe Dritan Zagani ka patur me eproret e tij, konkretisht 89 email-eve zyrtare për periudhën shtator 2012-2015 nuk rezulton që Zagani të ketë raportuar për lidhje të të afërmeve të ministrit të brendshëm Tahiri me trafikun e drogës. Në këtë vendim të Prokurorisë së Fierit, hidhet dritë dhe mbi akuzat e ish oficerit Zagani për makinën e ministrit Tahiri, që sipas tij është përdorur për trafik. Pas dokumentacionit dhe verifikimeve qe Prokuroria e Fierit ka kryer, rezulton se makina me targat AA 003 GB, është regjistruar e shitur në nëntor të vitit 2013. Kjo vërtetohet dhe nga këqyrja e sistemit të Ministrisë së Drejtësisë për pasqyrimin e veprave juridike, por dhe nga deklarimi i pasurisë për vitin 2014, që ministri Tahiri kishte depozituar në ILDKP. Të gjitha taksat e këtij automjeti janë paguar nga blerësi Artan Habilaj. Ndërkohë në Drejtorinë Rajonale të Shërbimit të Transportit Rrugor të Tiranës, këtij automjeti nuk i është ndryshuar emri për shkak të një urdhër bllokimi të lëshuar pas procesit që Saimir Tahiri pati në vitin 2012 me fëmijët e ish-kryeministrit Berisha. Pavarësisht pushimit të çështjes, Prokuroria e Fierit në vendimin e saj evidenton se në kallëzimet publike, ish-oficeri i antidrogës se Fierit, Dritan Zagani, nuk ka cenuar informacionet e rezervuara dhe rrjedhimisht nuk ka kryer veprën penale te “zbulimit te akteve dhe te dhënave sekrete”. Në të gjitha deklaratat e tij publike, prokuroria thekson se Zagani është kujdesur të mos zbulojë identitetin e personave të akuzuar si dhe burimet e tij, duke i përmendur ata me iniciale. Dritan Zagani u arratis nga Shqipëria ne shtatori të vitit 2015, ndërsa ndodhej ne arrest shtëpie ne Vlore, ne procesin gjyqësor për shpërdorim detyre, i cili vazhdon ende.