Deklaratat e Komisioneres për Zgjerimin e BE, Marta Kos se zgjedhjet në Shqipëri ishin të lira dhe të ndershme u komentuan sërish nga Kryetari i Partisë Demokratike, Sali Berisha.
Duke i cilësuar si pasionante, Berisha u shpreh se qasja e Kos nuk pasqyrohet njëjtë edhe nga Bashkimi Europian.
“Sa i përket deklaratës së zonjës Marta Kos, përshëndet deklaratën e Komisionit, por dhe të ambasadorit të BE dy ditë më parë, që e lanë deklaratën apasionante të Kos, pa komentuar. Të gjithë janë të detyruar që të flasin për zgjedhjet atë që thonë institucionet zyrtare”, tha Berisha.
Në konferencën për mediat, lidhur me takimet e Ervin Salianjit dhe Ilir Alimehmetit, kryedemokrati sqaroi se do të dëgjohet çdo zë brenda forumeve të partisë, por takimet private nuk do të merren për bazë.
“Analiza bëhet brenda partisë, si ta duan të hapur për mediat ose jo. Asnjë takim privat nuk më impresionon. Asnjë takim privat. Ndërkohë do dëgjohet çdo zë brenda forumeve. Kjo është detyra ime”, u shpreh Berisha.
I pyetur nëse është takuar me Ilir Alimehmetin, Berisha theksoi se kanë zhvilluar një takim ku ka folur edhe per çështje të përgjithshme.
“Po e kam takuar. Ka kërkuar takim dhe e kam pritur. Salianji nuk ka kërkuar takim. Me Alimehmetin kemi folur edhe për këto që po ju them ju. Ishte takim mes meje dhe Alimehmetit, e kërkoi vetë. E them që unë pres shumicën dërrmuese”, deklaroi Sali Berisha.
Kreu i PD thotë se do të jenë strukturat e partisë që do të caktojnë qëndrimin që do mbahet ndaj të ashtuquajturve tradhtarëve që sollën në humbjen e zgjedhjeve të opozitës më 11 maj.
/vizionplus.tv
