Me debate është shoqëruar seanca e sotme plenare mes kreut të Partisë Demokratike, Sali Berisha dhe ministrit të Bujqësisë Andis Salla.
Berisha deklaroi se nuk ka asnjë vend në Bashkimin Europian që ka hequr subvencionin e naftës për fermerët, duke theksuar se vendet e BE-së ndahen në grupe sipas nivelit të subvencionimit. Sipas tij, “Gjermania që më parë kishte subvencion mesatar, këtë vit ka kaluar në subvencion maksimal”, ndërsa shtoi se fermerëve u nevojitet në radhë të parë mbështetje për naftën. Ai u shpreh gjithashtu kritik ndaj qeverisë për mënyrën e menaxhimit të skemave të mbështetjes në bujqësi.
Sali Berisha: Nuk matemi me vendet e BE dhe kjo është e drejtë, por vetëm për Kosovën duhet t’u rikujtoj këtu, Kosova ka ndarë këtë vit 200 milionë euro për bujqësinë. 200 milionë euro për bujqësinë! Kosova ka ndarë katër herë më shumë se Shqipëria. Kosova jep për një hektar grurë, 400 euro. Kosova jep për një hektar grurë për plehrat, 100-150 euro. Jep për farën, jep për naftën. Tani, le të gjejnë një vend të vetëm në BE që ka hequr subvencionin e naftës.
Absolutisht, asnjë vend! Ua them unë ju. Vendet në BE ndahen në tre grupe. Ato që bëjnë subvencion maksimal, ato që bëjnë subvencion mesatar dhe ato që bëjnë subvencion më të ulët. Këtë vit, Gjermania që bënte subvencion mesatar, kaloi në subvencion maksimal. Se je bërë i famshëm ti, merita jote më e madhe që fut ato dosat në shpërblim. Shumë mirë ke bërë, por nuk është vetë dosa ajo që u duhet fermerëve. Në radhë të parë është nafta. Në radhë të parë duhet t’u japim naftën. Atë mirë e ka bërë, nuk them.
Nga ana tjetër, ministri i Bujqësisë Andis Salla deklaroi se skema e mbështetjes për fermerët shqiptarë është përafruar me standardet e Bashkimit Europian dhe se këtë vit për këtë sektor janë akorduar mbi 100 milionë euro. Sipas tij, përfshihen 52 milionë euro nga buxheti i shtetit dhe të paktën 15 milionë euro të tjera për kompensime, duke theksuar se skema synon rritjen e prodhimit dhe formalizimin e sektorit bujqësor.
Andis Salla: Për fermerët shqiptarë është një skemë që e kemi përafruar me BE, është një skemë nga buxheti i shtetit 52 mln euro, në rritje nga viti i kaluar. Përveç kësaj kemi edhe një minimum 15 mln euro të vendosur për 10% e kompensimit të çdo fature të cilën ai që punon tokën do të marrë kompensimin në çdo produkt bujqësor. Qeveria shqiptare ka akorduar mbi 100 mln euro që do të jenë këtë vit vetëm për subvencionet dhe pagesat direkte për ta çuar sektorin në një hap tjetër. Po ecim me një shifër shumë të mirë mes fermerëve, përpunuesve dhe agro përpunuesve që kemi në funksion të plotë dhe po ndërtojmë me bashkitë ShBB-të në mënyrë që sektori i bujqësisë të ecë me një ritëm tjetër./vizionplus.tv
