De Biasi dhe Taulant Xhaka duket se ne ta ardhmen do te kenë tashme dy rruge te ndryshme. Ne konferencën per shtyp ne prag te miqësores me Bosnjën, tema kryesore ishte polemikat e ditëve te fundit pas largimit te Taulant Xhakës nga grumbullimi kuqezi.
“Unë jam 60 vjeç, ndërsa Xhaka 27. Trajneri kujdeset për lojtarët e tij, ndoshta ata jo për veten e tyre. Ka rregulla për të qëndruar në grup, i pari është të respektosh shokët dhe vendimet e trajnerit. Nëse dikujt i duket vetja më i mirë mjafton ta tregojë në fushë. Unë ua kam dhënë mundësinë të gjithëve, por nëse mendon se duhet të luajë gjithmonë kjo është një çështje tjetër që nuk më takon. Nëse dikush vetëpërjashtohet atëherë nuk është puna ime, unë jam mësuar të përballem me vështirësitë. Nëse paraqitesh mirë te skuadra ku luan, nuk do të thotë domosdoshmërish se do të luash me përfaqësuesen”.
Edhe nje here, numri një i pankines shqiptare vuri theksin tek vendimet qe, sipas tij, janë nje ekskluzivitet i trajnerit, ndërsa ashpërsoi qëndrimin, duke deklaruar se ata qe nuk i respektojnë, mund te zgjedhin një rruge tjetër.
“Jam pjesë e futbollit prej shumë kohësh. Jam një njeri që e kam mbajtur fjalën edhe në momentet më pak të mira. Kam një marrëdhënie të veçantë me lojtarët e mi dhe nuk jam i influencuar nga thashethemet që qarkullojnë shpesh. Zgjedhjet i bëj unë, nëse dikush nuk është dakord është i lirë të largohet. Këtu nuk mungon disiplina, madje është e kundërta. Këtu po flasim për lojtarë që kanë shumë dëshirë të japin kontributin e tyre, nëse nuk dëshirojnë mund të largohen, është zgjedhja e tyre”.
Ne fund, italiani foli edhe për miqësoren me Bosnjën, duke deklaruar se kuqezinjtë do te përpiqen te arrijnë nje rezultat pozitiv. Nje përballje qe sipas tij, ku do te kërkohet qe ne skuadër te integrohen edhe me elemente te rinj.
