Kryeministri i greqisë Alexis Cipras është takuar me homologun e tij maqedonas, Zoran Zaev në Forumin Ekonomik Botëror që po mbahet në Davos.
Sipas mediave greke takimi mes tyre ka zgjatur më shumë se 2 ore e gjysmë dhe të pranishëm ishin edhe ministrat e jashtëm të të dy vendeve.
Tsipras dhe Zaev diskutuan për gjetjen e një zgjidhjeje të përbashkët për çështjen e emrit të Maqedonisë, temë e cila ka shkaktuar jo pak debate në parlamentin grek dhe në të gjithë Greqinë pak ditë më parë.
Pak para takimit, Zaev, me anë të një postimi në Twitter ku duket dhe një foto me Aleksis Cipras, shkruan se “Takimi me Kryeministrin e Greqisë filloi për të diskutuar dhe për të ndërtuar besimin reciprok për të mirën e qytetarëve”.
Ndërkohë, më herët, Cipras foli edhe për çështjen e refugjatëve, në panelin ku ishte i pranishëm edhe kryeministri italian Paolo Xhentiloni.
Një tjetër takim qe pritet me interes është edhe ai i Cipras me komisionerin për zgjerimin, Johannes Hahn dhe kryeministrin Edi Rama, të enjten.
